Maniitsumi meeqqat atuarfiata "Atuarfik Kilaaseeraq" oquttup taarserneqarniarnissaanut atsioqataagit

Maniitsumi atuarfik oquttoq

August naajartortoq Maniitsumi Atuarfik Kilaaseeqqami angajoqqaat atuartuutillit atuarfimmiit naapitinneqarput, qangali ilisimaneqalereersoq atuarfiup oqoqarnera peqqutigalugu atuarfiusussap aallartilernerani klasset arlallit matuneqarallartariaqarneranik ilisimatinneqarlutik, taassumalu saniatigut iluarsartuussinissamik pilersaarut saqqummiunneqarluni.

Ataatsimiisitsineq naammassimmat angajoqqaat suleqatigiissitanik pilersitsipput siunertaralugu:

Atuarfik Kilaaseeqqap ukiuni kingullerni misissorneqartarnerata takutippaa akuerineqarsinnaasumiit annertunerujussuarmik oqoqartoq, allarpassuarnik aammatunngaveqarluta angajoqqaatut atuarfiup allamik taarserneqarnissaa piumasarineqarluni.

Atuarfik Kilaaseeqqami oqoqarneranik skolebestyrelse misissuisitsimmat takuneqarsinnaavoq oqummik misissuisarnermi ajornerpaaq 999-mik nalilerneqartartuusumit annertunerujussuarmik, ilaatigut 12000 sinnerlugit kisitsisilerneqarsimasumik allaat oqoqartoq. Imaappoq ulorianartoq isersimaffigineqartussaanngitsorlu.                      Maannakkut atuarfik tamaat misissorneqarnikuunngilaq, atuartut angajoqqaat ilinniartitsisullu piumaffigineqarnikuupput nappaalaffiusut maluginiartassagaat atuarfiup sorpiaaneernersut, tamanna uissuumminarpoq akuerineqarsinnaananilu. Meeqqat nalilersuutitut atorlugit oqummik misissuiffissanik ujartuineq atorneqarsinnaanngilaq, inunnillu suusupaginninnerulluni. Taamaattumik angajoqqaatut makkua piumasaraagut:

1. Atuarfiup oqoqarpallaarnera aammalu siallernerani kusertarnera peqqutigalugu atuarfimmik nutaamik sanasoqarnissaa siunniunneqassasoq.

2. Aningaasat iluarsartuussinissamut missingiussat 71 mio. kr. unitsinneqassasut, taarsiullugulu nutaamik atuarfiliornissamut piaartumik ilassutissarsiuunneqassasut, fondit allallu periarfissat ujartorneqapallassasut.

3. Qeqqata Kommuneani akisussaasut qinikkallu piaartumik sukumiinerusumillu innuttaasunut oqallitsitsisariaqartut, atuarfik nutaaq aallaavigalugu, iluarsartuussinissarlu aatsaat siusinnerpaamik april 2024 aallartittussatut siunniussaq nipangiullugu.

Pisoq uissuumminarpoq ilungersunarlunilu, taamaattumik akisussaasut suliassamik tigusisariaqarput, qinikkat akisussaasuunerpaasut pissutsit qanimut iluamik takusariaqalerpaat atuarfik atorsinnaanngitsoq, oqoqarpallaartoq, allanngortiterneqarsinnaanngitsoq, imaq ulerujussuaraangat kælderia immattuartartoq nutaamik taarsertariaqavissoq. Ukiuni qulikkaani kingullerni Qeqqata Kommuniani Maniitsumiit maluginiarsimaqaarput Sisimiuni atuarfik ataaseq iluarsaanneqartoq, atuarfillu aamma nutaaq sananeqartoq, soorunami atuartut qutsannaqaat, kisianni allanngilaq Maniitsumi atuarfik QANGALI oqoqarneranik takussutissaqareersoq isiginngitsuusaarlugu siulliuniuuttoqarsimasoq.

Pissutsit taamaaginnarsinnaanngillat, meeqqat peqqissusaat annertuumik kalluarneqarsinnaavoq, oqummi taama annertutigisoq ataavartumik (kroniskimik) puakkut meeqqanut atuarfimmilu sulisunut ”pedel asasaasut ilinniartitsisut-nut” napparsimalissutaasinnaavoq.

Qularnanngilluinnarporlu ukiorpassuanngulersuni Maniitsumi Kilaaseeqqap atuarfiani ilinniartitsisussaaleqineq qulaani taaneqartuni tassa oqoqarnera aammalu aserfallassimaqinera pisooqataalluinnartuusoq.

Inuttaasuusugut killiffik akuersaanngilluinnarlugu piaartumik qanoq iliuuseqartoqarnissaaq kissaatigaarput.

Neriulluta pissutsit ilungersunarluinnartut inissisimasut peqqutigalugit Maniitsumi angajoqqaat aammalu nunaqqataasut atsiorumaartut, ersersinniarlugu Maniitsumi Kilaaseeqqap atuarfia nutaamik taarserneqarnissaa.

Taamaammat Maniitsumi meerartagut sulisullumi illersorniarlugit atsioqatigisigut.