Kommune Kujallermi Meeqqat ulluinnarni ataatsimoorfii aamma iliuuseqarfigineqarlik.
Asasarput Kommune Kujallermi Borgsmesteri Kiista P. Isaksen.
WHO nalunaaruteqareernikuuvoq nunarsuaq tamakkerlugu Corona virus [Covid-19] nunani tamalaanni tuniluunnersuaqalernissaanik ernumanartoqartoq. Tamanna piviusunngorpoq, maannakkut Kalaallit Nunaat eqqugaariaanaavoq, tassami 11.Marts 2020 WHO nalunaarmat corona Virus [Covid-19] Nunarsuaq tamakkerlugu tuniluutunngortoq naqissusermagu.
Nualluut siaruaanissaa pinaveersaartinniarlugu nunarput tamaat sillimaniarneq pinerullugu ataatsimiittaliarsuaq paasissutissanik innersuussutinillu siammarterisoqarpoq.
12.Marts 2020 aallarnerfigalugu angallannerit nunatta avataanut aammalu nunatta iluani pisariaqavinngitsumik angalanerit unikaallatsinneqarput, nunaqavissulli nunat allaniit nunatsinnut suli tikerarlutik.
Inuit 100-nit amerlanerusunik ataatsimoorfiusinnaasut killilerneqarput, bussini, neriniartarfinni allanilu ataatsimoorfiusuni isersimasinnaasut killilerneqarlutittaaq. Kommune Kujallermi innuttaasunik kiffartuusiviit ‘matuneqarput’. Kisiannilu atuarfiit meeqqeriviillu ammatiinarneqarlutik. Ulloq manna malitsigalugu angajoqqaarpassuit apeqqusersuillutik aallartipput.
- Sooq Kommune Kujallermi ataatsimiititaliarsuup innersuusutai meeqqat atuarfiannut meeqqerivinnilu atuutinneqanngillat?
- Sooq inuit 100 ataallugit ataatsimoorfigeqqusaappata, atuartut sulisullu katillugit 500 missaaniittut ataatsikkut atuariartortinneqassappat/suliartortassappat?
- Sooq atuarfiit immikkut iliuuseqartoqanngila? Sooruna atuartut sulisullu 500 missaaniittut ataatsimooqusaasut, inimilu ataatsimi atuartitsiffiusumi amerlanerpaaffissalersorneqaratik?
- Sooq meerartagut ilinniartitsisugullu sulisut allat assigalugit illersorneqanngillat?
- Sooq ilinniartitsisut Kommunep ataani sulisuullutik Kommunep allaffiani sulisutuulli illersorneqanngillat?
Italiami Danmarkimilu strategi atorneqartoq, tassa nappaat annerusumik tuniluutinnginnerani ulluinnaat ingerlanneqarsinnaaneri iluatsinngitsoorpoq, nunammi taakku maannakkut tunillaasuunneq sukkasoorujussuarmik siaruaammat.
Nunavumi atuarfiit tamarmik matuneqarput, naak suli Corona Virus [Covid-19] tuniluutilinngikkaluartoq. Tassuuna Nunavut takutippaat sillimaniarneq nappaasuup apuutinnginnissaanut qanoq pimoorutsigineraa.
- Sooq akuerissavarput Corona Virus [Covid-19] aatsaat apuuppat iliuuseqassalluta?
- Sooq napparsimaveqarfigut sulisutigut atortussatigullu killeqareersut suli sukataartissavagut?
- Nunatsinni toqqaanartumik misissuiveqanngitsugut sooq tunillatsittoqarnissaanut utaqqiuarsinnassaagut?
- Sooq nunat allat kukkussutaat takoreerlugu kukkussutaat anguniassavarput?
- Sooq nunat allat kukkussutaat ilinniarfigalugu allatut iliussanngilagut? Atuarfiit ammatiinarlugit tuniluunnersuaq aallartippat ingerlaanartumik illoqutigiit imminnut tunillaasuutilissapput.
Atuarfiit ataatsimoorfiusut inuit 500 missaanniittunik ataatsimoorfiuvoq. Tassani tuniluunneq aallartissagaluarpat peqqinnissaqarfipput artukkerneqassaaq. Assersuutigalugu Qaqortumi inuit 10%-ii eqqugaapput. Taava imaappoq inuit 3.100-suni 310-it inuit napparsimalissapput, taakkunannga napparsimalertut 80% nammineerlutik aaqqissinnaallutik. Taava imaappoq: Napparsimasunit 310-nit 280-it peqqississapput, sinnerilu 40 missaaniittut peqqinnissaqarfitsinni ikiorserneqartariaqassapput. Maannakkut napparsimavimmi ikiorsiinissamut inissat qassit pigineqarpat? Corona Virus [Covid-19] ima sakkortutigaaq, peqqissigaluaraanniluunniit nualluummik tunillatsittoqaqqissinaaluni.
Asasarput Kommune Kujallermi Borgmesteri Kiista P.Isaksen, suli atuarfinni ammatitsiinarnissat aalajangiussimaviuk? Tassami Naalakkersuisugut oqarput Kommune atuarfeqarfiit meeqqeriveqarfiit akisussaaffigissagai. Taamaappat meerartagut qulaanni ernummatit pissutigalugit angajoqqaat angerlarsimatitsiinarusupput, nualluummik tuniluutoqannginnissaa pinaveersaartitsinerlu angorusullugu.
Nalunngilarput Kommune Kujalleq atuartunut iPad-nik agguuaanikuusoq, atuartitsinermut atorluarsinnaasunik. Tamanna angerlarsimaffimmi atuartitsinissamut periarfissaanerpa? Periarfissaanerpa ulluni 14-ni atortorissaarutit taamaatut sakkugalugit atuartitsinerup ingerlanneqarsinnaanera? Taasuuma saniatigut soorunami atuakkat naliginnaasut aamma atorluarneqarsinnaallutittaaq. Taamaalilluni atuartitsinermi ulluinnarni ingerlariaaseq aallaavigalugu atuartitsineq angalersimaffimmiit ingerlanneqarsinnaagaluarluni. Taamaattumik kissaatigaarput siullertut piaarnerpaammik ullut 14-t atuartut angerlarsimatiinarneqarnissaminut periarfissaqassasut, qulaanni periarfissat atorlugit ilinniartitsisoq peqatigalugu atuakkerinissaat aaqqissuuneqarsinnaappata . Taamaalilluta illersoqatigiinneq pinaveersaartitsinerlu aallaavigalugu qanoq iliuuseqarnissamik siunnersuuterput ilassilluarneqarnissaa kissaatigaarput.
Inussiarnersumik Kommune Kujallermi innuttaasut.
Betty Ottosen Kontakt forfatteren af dette andragende