Aasiammiuuvunga iluamik sullinneqarusuttoq

Allatulli sullinneqarusukkaluarpunga!

 

Pingasoriarlunga misiginikuuara politiimiit sulinerminut atatillugu sulliseqarluni angerlarsimaffinnut orniguttumik suliamut tunngatillugu aggertuusaarluni marloriarluni atoqatiginikuuaanga. Pinaaseraluartunga uteriisertorsuulluni atoqatingalunga.

Tassunga tunngatillugu siornatigut 1999-mi sullissarilerpaanga taassuma inuup. Meeraaninni atornerlunneqarnikuunera paasiniarnikuugakku qanoq pisoqarsimanersoq.

Retsbogi malillugu nassuiaappaanga, kisianni kingorna 2002-mi pisimasoq aallartippoq tassa uinnut tunngatillugu paasiniaasuusaarpoq susoqarsimaneranik mappersualerluni sulilluni iserfigaanga taamanikkut suliffinnut atatillugu vakantimik inimik tunineqarama uingalu ineqatigiinngikkallarnitsinni.

Ukiut marluk matuma siorna suli misigissutsikkut annernarnerusumik tassalu uinga parnaarussaaqqasoq tigummigallagaasoq imaasiallaannaq takusinnaanagu taanna politeeq allaffimini aamma taamatoqqissaaq atoqatigaanga tarnikkut nukillaarteriarlunga (sanngiilliseriarlunga) atoqatingalunga. Naak politeeqarfiup gangia inunnik utaqqisunik inoqaraluartoq taakkua sullissat soqutigineqaratik arnarniarfigitippunga.

Uinga parnaaruteriarlugu inuttut nakkarsaatinik oqaatsinik tuniorarlunga, uiinuna meeraanermini inuttut ajornartorsiuteqarami ilinnut tujormisitsisartoq. Tamakkua oqaatsit allaat atorneqarlutik uppertitsiniutitullusooq atorlugit pissusilersorfigaanga.

Naammagittaalliutiginikuuara, atorfimminiit apparsaaffigineqarnikuuginnarpoq soraarsitaanngilaq imaluunniit parnaarussaanngilaq. Taakkua saniatigut ikiaroornartulerisuusartoq aamma naammagittaalliutigingaara nunaqqatigiit nalunngimmassuk politeeq taanna ikiaroornartulerisuusarsimasoq siornatigut, aammalu ukiukittumik atoqateqarniarnikuunera tusarnikuusara anngullugu. Taakkuali politimesterimiit isiginiarneqanngillat uppernarsaatissaminngooq peqanngimmat uanga upperiumaneqanngittunga. Tassunga tunngatillugu facebookkikkut Aasiammiunut allannikkuuvunga tamakkua nalaatat oqaluttuaralugit. Saaffiginnittoqarnikuuvoq assigusumik tassannga inummiit atoqatiginiarneqartarsimasumik. Taamaattumik kisimiinngilanga, sulilu suliffimini maanna sulivoq taamaallaallu atorfimminiit apparsaaffigineqaannarnikuulluni. Tassa imaannerpa uanga asuli inukulunnguungama nuimasuunangalu upperiumaneqarnavianngittunga. Sallu aqqutingalugu imminut annaanniartoq qujanarniarnermut ilikkaannarnikoq taava upperineqarnerulluni sumillu naamik sunneqarani.

Taamaattumik atsiornernik katersivunga manna aqqutingalugu innuttaasut toqqisisimasumik sullinneqassappata tamakkua qulaani taakkartorneqartut misigiteqqinneqassanngippata.